Dr Tino u dNadine hei sech im Spätsommer 2007 im Usgang im Dudu zerste mau gseh. Bir Nadine wär ja das nid verwunderlech, dass sie ir Nacht irgendwo i de Berner Hüser azträffe isch, aber bim Tino scho eher. Er het nämlech mit Usgang u Disco nid so viu am Huet. Dr Zuefall wotts aber, dass einigi Zyt später die zwöi sech no grad emau am gliiche Ort wieder treffe u dr ganz Abe mitenand rede. U ei Zuefall chunt selte allei: dr Tino u dNadine sie oh am Zibelemärit 2007 zur gliiche Zyt am gliiche Ort. Jetz isch es aber Zyt, einisch dNatelnummere ustuusche!

DNadine isch Mitti Dezember 2007 für ne Monet uf Brasilie u het vom Tino zum Abschied zerste churze Müntschi übercho.

Nach vielne, vielne SMS u Verabredige isch es am 16. März 2008 de ändlech klar gsi. Dr Tino isch mit dr Lorena und mit 33 rote Rose bewaffnet a zGeburtstagsfest vor Nadine cho. Das isch zZeiche gsi, dass die zwöi jetz zämeghöre.

Sit her isch viu passiert: Im Dezember 2008 si die Zwöi am Eigerweg 10 zGümlige zäme zoge. Nach em ne intesive Schliefe vo Egge u Kante im gmeinsame Huushalt - er eher organisiert, sie eher chaotisch - hei dNadine u dr Tino beschlosse, dass ihri Beziehig gnue rund louft um ne Familie zgründe. U es isch gar nid lang gange, hei die zwöi oh scho es chlises Gheimnis ume treit...

9 Mönet u 4 Tag später isch dr Luca am 26. Juli 2010 im Salem Spital zBern uf dWelt cho. dNadine u dr Tino si vom erste Ougeblick a verzouberet gsi vo dem chline Schlingel u hei zFamilieglück mit dr Lorena u ihrem Brüetsch in Gümlige voll u ganz gnosse.

Doch langsam isch dr Wunsch nach eigete vier Wänd ufcho u so hei sech die Zwöi uf zSuechi nach emne Eifamiliehüsli gmacht. Nach emne halbe Jahr, si dNadine u dr Tino im Oktober 2010 in Boll a dr Bernstrasse 67 fündig worde u e Monet später isch dr Vertrag unter Dach u Fach gsi. Nume no "chli" umboue... U so isch me am 1. April 2011 nach Boll züglet u het sech Schritt für Schritt ds Eigeheim renoviert u verschöneret.

Glii druf abe hei dNadine u dr Tino es nöis Gheimnis gha. Dr Luca wird im Mai e grosse Brüedsch...

U wüu alles so klar isch, het dr Tino am 14. Februar 2012 dNadine gfragt, öb sie sini Frou wott werde. Es liebs Briefli u e wunderschöne Verlobigsring vom richtige Ma heis dr Nadine eifach gmacht "JA" zsäge. U wie Froue so si, isch sie am nächste Tag hinter Planig vom Hochzyt. Dr Tino, eher pragmatische Natur, het nüme verstande, wie ihm gscheht. Aber schlussendlech hei sech die Zwöi entschiede, am 23. März 2012 standesamtlech u am 08. September 2012 kirchlech zhürate.

U so sitze mir jetz hie u gstalte für üsi Gäst die Homepage.... Mir wünsche viu Spass bim Lese u freue üs fest uf üses Hochzyt- u Touffest!